එක්සත් ජාතීන්ගේ අධ්‍යාපනික, විද්‍යාත්මක සහ සංස්කෘතික සංවිධානය වන යුනෙස්කෝ සංවිධානයේ ශ්‍රි ලංකාව සදහා වු ජාතික කොමිෂන් සභාවේ නව නිලධාරී මණ්ඩලය පත් කිරීම ඊයේ සිදු වුණා.
ඒ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, ආග්‍රාමාත්‍ය ආචාර්ය හරිනි අමරසූරිය මෙනවියගේ සහභාගිත්වයෙන් බත්තරමුල්ල ඉසුරුපාය අධ්‍යාපන අමාත්‍යංශයේදී යි.
ශ්‍රී ලංකා ජාතික යුනෙස්කෝ කොමිෂන් සභාවේ සභාපතිත්වය ආග්‍රාමාත්‍යවරිය විසින් දරයි.
එහි උපසභාපතිත්වය අධ්‍යාපන අමාත්‍යංශ ලේකම් නාලක කලුවැව මහතා විසින් දරනු ලබනවා.
අධ්‍යාපනය, විද්‍යාව, සංස්කෘතික, ජන සන්නිවේදනය, සමාජ විද්‍යාව සහ පරිසරය යන විෂයයන්ට අදාළ යුනෙස්කෝ සංවිධානයේ නිර්ණායකයන්ට අනුව දේශීය සංවර්ධන දැක්ම සාක්ෂාත් කරගැනීමට අදාළ සියලු අමාත්‍යාංශ එක්ව කටයුතු කිරීම මෙම සභාව පිහිටුවීමේ අරමුණයි.
මෙම කොමිෂන් සභාවේ සාමාජිකයන් ලෙස ආචාර්ය ආශා දිවොස්, චන්ද්‍රා වික්‍රමසිංහ, ආචාර්ය වී.වී මැදවත්තේගෙදර සහ සාමිනාදන් විමල් යන විෂය ප්‍රවීණයින් ඇතුළු ශ්‍රී ලංකා ජාතික යුනෙස්කෝ කොමිෂන් සභාවේ ප්‍රධාන විධායක නිලධාරී මහාචාර්ය ප්‍රභාත් ජයසිංහ, ලේකම් නාලක රත්නායක යන මහත්වරුන් සහ හේමන්තා පුබුදුසිරි, ශෂිකලා ප්‍රේමවර්ධන, සමන්ති සේනානායක,අප්සරා කල්දේරා, මොහොමඩ් නවාසි, ආර්.ඒ.ඩී.එස් රණතුංග, ඩබ්.ජී කුමාරගම, සුජීවා පල්ලියගුරුගේ, දීපා ලියනගේ, එච්.ඒ.එච් පෙරේරා, එස්.එස්.පී ද අල්විස්, වරුණ ශ්‍රී ධනපාල, ඩබ්.ඩබ්.එම්.පී.එස්.සී පාලම්කුඹුර, එම්.එස්.එල්.ආර්.පී මාරසිංහ, ආචාර්ය නිලාන් කුරේ, සනුජා කස්තුරිආරච්චි, යන මහත්ම මහත්මීන් පත්විය.
