ඓතිහාසික වශයෙන් වැදගත් දුම්රිය ස්ථානයක් සහ මෙරට දෙවැනි විශාලතම දුම්රිය ස්ථානය වන මරදාන දුම්රිය ස්ථානය නවීකරණය කටයුතු සහ පිටකොටුව මධ්‍යම බස් නැවතුම්පොළ ප්‍රතිසංස්කරණ කටයුතු ජනාධිපති අනුර කුමාර දිසානායක මහතාගේ ප්‍රධානත්වයෙන් අද (15) ආරම්භ වීම සම්බන්ධයෙන් ශ්‍රිලංකාවේ පළ වන පුවත්පත් ඇතුළු ජනමාධ්‍ය වැඩි ඉඩක් ලබාදී තිබෙනවා.
සිහින ගමනාන්තය, ව්‍යාපෘතිය යටතේ පෞද්ගලික අංශයේ දායකත්වයෙන් දුම්රිය ස්ථානයේ පෞරාණිකත්වයට හානි නොවන පරිදි මේ නවීකරණ කටයුතු සිදු කිරීමට නියමිතයි.
1964දී ස්ථාපිත කරන ලද පිටකොටුව මධ්‍යම බස් නැවතුම්පොළ රුපියල් මිලියන 424ක වියදමකින් වසර 60කට පසුව ප්‍රතිසංස්කරණය කිරීම විශේෂත්වයක්.
මධ්‍යම බස් නැවතුම්පොළෙන් දෛනිකව ක්‍රියාත්මක වන බස් රථ ගමන් වාර ගණන 1500කට අධිකයි.
මෙරට බස් නැවතුම්පොළ 50ක් නවීකරණය කිරීමේ ව්‍යාපෘතිය යටතේ මෙහි අලුත්වැඩියා කටයුතු ද සිදු කෙරේ. ප්‍රවාහන, මහාමාර්ග හා සිවිල් ගුවන් සේවා ඇමැති බිමල් රත්නායක මහතාගේ උපදෙස් පරිදි මේ වැඩසටහන් ක්‍රියාත්මක වනවා.
