ඇල්බේනියාව ලොව පළමුවරට කෘත්‍රිම බුද්ධියෙන් ඇමැතිවරයෙක් නිර්මාණය කරමින් ඉතිහාසයට එක්වූ බව විදෙස් මාධ්‍ය වාර්තා කරනවා
මේ කෘත්‍රිම බුද්ධි ඇමැතිවරයා ඇල්බේනියානු බසින් සූර්යයා අරුත දෙන ඩියේලා නමින් හඳුන්වා ඇති අතර, එරට දූෂණය තුරන් කිරීම ඩියේලාගේ රාජකාරිය බව ඓතිහාසික නිර්මාණය එළිදක්වමින් අගමැති එඩී රාමා ප්‍රකාශ කළ බව විදෙස් මාධ්‍ය වැඩිදුරටත් වාර්තා කර තිබෙනවා.
රජයේ ප්‍රසම්පාදනය අධීක්ෂණය කිරීම කෘත්‍රිම බුද්ධි ඇමැතිවරයාගේ කාර්යභාරය බවත්, රජයේ ටෙන්ඩර්, කොන්ත්‍රාත්තු සහ පෞද්ගලික සමාගම්වල විවිධ ව්‍යාපෘති විනිවිදභාවයකින් යුතු සිදුවන්නේදැයි අධීක්ෂණය කිරීම ඩියේලා වෙතින් අපේක්ෂා කරන බවත් ඇල්බේනියානු අගමැතිවරයා ප්‍රකාශ කර ඇති බව විදෙස් මාධ්‍ය සඳහන් කරනවා.
එරට ප්‍රසම්පාදන ක්‍රියාවලිය සහ ටෙන්ඩර් පටිපාටිය ඔස්සේ ජනතාවගේ සෑම මුදලක්ම 100%ක්ම නිවැරදිව භාවිත කිරීම රජයේ අරමුණ වී ඇතැයි ද, ඒ සඳහා ඩියේලාගෙන් විශාල දායකත්වයක් ලැබෙනු ඇතැයි ද අගමැතිවරයා විශ්වාසය පළ කර තිබෙනවා.
තරුණියක් ලෙස නිර්මාණය කර ඇති ඩියේලා සාම්ප්‍රදායික ඇල්බේනියානු කාන්තා ඇඳුමින් සැරසුණු රුවකට හිමිකම් කියන අතර, කැබිනට් මණ්ඩල රැස්වීම්වලදී වීඩියෝ තාක්ෂණය ඔස්සේ ඊට සම්බන්ධ වනු ඇතැයිද, සාකච්ඡාවලදී සිය අදහස් පළ කරනු ඇතැයි ද වැඩිදුරටත් වාර්තා වනවා.
(WAKE UP TO 7 – දිනමිණ)
