ඇමරිකාවේ පදනම් විරහිත චෝදනා නතර කරන්නැයි චීනයෙන් ඉල්ලීමක්

ඇමරිකානු නියෝජිතයා චීනයට එරෙහිව කළ චෝදනා එක්සත් ජාතීන්ගේ සංවිධානයේ චීන උප නිත්‍ය නියෝජිත Geng Shuang මහතා ප්‍රතික්ෂේප කරයි. යුක්රේනයට අවි සැපයුම පිළිබඳ ගැටළුව ඊයේ (31) දිනයේ ආරක්ෂක මණ්ඩලයේ දී සලකා බැලූ අවස්ථාවේ ඔහු මේ බව පැවසීය.

යුක්රේන අර්බුදයට සම්බන්ධ කිසිදු පාර්ශ්වයකට චීනය කිසිවිටෙකත් මාරාන්තික අවි සපයා නොමැති බවත්, ඩ්‍රෝන යානා ඇතුළු හමුදා සහ සිවිල් ජනතාව යන දෙපාර්ශ්වයටම භාවිත කළ හැකි භාණ්ඩ අපනයනය සැමවිටම දැඩි ලෙස පාලනය කර ඇති බවත් Geng Shuang මහතා කියා සිටියේ ය. චීනය රුසියාව සහ යුක්රේනය සමඟ සාමාන්‍ය වෙළඳ සබඳතා පවත්වා ගෙන යන අතර, කිසිදු ජාත්‍යන්තර නීතියක් හෝ ජාත්‍යන්තර බැඳීමක් උල්ලංඝනය කර නොමැත. එමෙන්ම,අද වනතුරුත් ඇමරිකාව රුසියාව සමඟ වෙළඳ සබඳතා තවදුරටත් පවත්වාගෙන යන පසුබිමක එවැනි සබඳතා සඳහා සෙසු රටවලට අවස්ථාවක් නොදෙන්නේ මන්දැයි ඔහු ප්‍රශ්න කර ඇත.

තම පදනම් විරහිත චෝදනා නවතා, සටන් විරාමය සහ සාම සාකච්ඡා ප්‍රවර්ධනය සඳහා වඩාත් ධනාත්මක කාර්යභාරයක් ඉටු කරන ලෙස චීනය නැවතත් ඇමරිකාවෙන් ඉල්ලා ඇත.
-CGTN Sinhala

ඇසළ පෙරහැර මංගල්‍යෙය් තෙවන කුඹල් පෙරහැර අද රාත්‍රීයේදී

සෙංකඩගල ඇසළ පෙරහැර මංගල්‍යයේ තෙවන කුඹල් පෙරහැර අද (01) රාත්‍රී වීදි සංචාරයට නියමිතයි.

නාථ, විෂ්ණු, කතරගම සහ පත්තිනි යන සිව් මහ දේවාල පෙරහැර සමඟින් ශ්‍රී දළදා මාලිගාවේ පෙරහැර රාත්‍රී 07.16ට යෙදෙන සුබ මොහොතින් උතුරු දිශාභිමුඛව වීදි සංචාරයට එක්වනවා.

එම පෙරහැර දළදා වීදිය, ඩී.එස්.සේනානායක වීදිය, කොළඹ වීදිය, කොටුගොඩැල්ල වීදිය ඔස්සේ ගමන් කොට රජ වීදියෙන් ශ්‍රී දළදා මාලිගාව වෙත ගෙවැදීමට නියමිතයි.

දෙවන කුඹල් පෙරහැර ඊයේ (31) රාත්‍රී වීදි සංචාරය කළ අතර සධාතුක පෙරහැර කරඩුව වැඩම කරවන ලද්දේ ශ්‍රී දළදා මාලිගාවේ ඇත් පන්තියට අයත් සිංහ රාජා ඇතු විසිනි.

කෝට්ටේ රජ මහ විහාරයේ කෝට්ටේ රාජා ඇතු සහ දළදා මාලිගාවේ ඇත් පන්තියට අයත් පුලතිසි රාජා ඇතු දෑලේ ගමන් ගත්තා.

ශ්‍රී දළදා මාලිගාව නියෝජනය කරමින් පෙරහැරේ ගමන් කරන ලද්දේ නාථ දේවාලයේ බස්නායක නිලමේ ඒ.ඩබ්ලියු.එස්. බණ්ඩාරනායක මහතායි.

දෙවන කුඹල් පෙරහැර නැරඹීම සඳහා සැදැහැවතුන් හා විදේශීය සංචාරකයන් රැසක් සහභාගී විය.

ඇමරිකාව විසින් ලංකාවේ භාණ්ඩ සඳහා තීරු බද්ද 20% ක් දක්වා අඩු කරයි

ශ්‍රී ලංකාවෙන් ඇමරිකාවට අපනයනය කරන භාණ්ඩ සඳහා අයකරන තීරු බද්ද 20% ක් දක්වා අඩු කිරීමට ඇමරිකාව තීරණය කර තිබෙනවා.

මේ ආකාරයෙන් අනෙකුත් රටවල් වලට ද කලින් ප්‍රකාශයට පත්කළ තීරු බදු අනුපාතය අඩු කිරීමට කටයුතු කර ඇත.

ඇමරිකාව විසින් මීට පෙර ශ්‍රී ලංකාවෙන් අපනයනය කළ භාණ්ඩ සඳහා 10% ක තීරු බද්දක් අය කළා. පසුව ට්‍රම්ප් පරිපාලනය විසින් එය 44% ක් දක්වා වැඩිකරන ලද අතර පසුව එය නැවතත් 30% ක් දක්වා අඩු කිරීමට ට්‍රම්ප් පරිපාලනය පියවර ගත්තා.

එම ප්‍රමාණය නැවතත් මෙසේ 20% ක් දක්වා අඩුකර තිබෙනවා.

නව බදු අනුපාත අඩු වීම් ලෙස වියට්නාමය (20%), ඉන්දියාව (25%), බංග්ලාදේශය (20%) යන තරගකාරී රටවල ආසන්නයටම පැමිණ තිබෙන අතර එය ලංකාවේ අපනයන තරගකාරීත්වය පවත්වා ගැනීමට අනිවාර්යෙන්ම රුකුලක් වනු ඇත. තායිලන්තය, පාකිස්තානයේ සහ ඉන්දුනීසියාවේ බදු අනුපාත 19% ක මට්ටමක පවතී.

ජාතික දූෂණ විරෝධී ක්‍රියාකාරී සැලැස්මේ ප්‍රධානීන් සමඟ සාකච්ඡාවක් ලේකම් කාර්යාලයේදී

ජාතික දූෂණ විරෝධී ක්‍රියාකාරී සැලැස්ම 2025-2029 හි ක්‍රියාකාරීත්වය අධීක්ෂණය කිරීමට පත් කරන ලද ජාතික මෙහෙයුම් කමිටුවේ සහ ඊට අදාළ වගකීම් පැවරී ඇති රාජ්‍ය හා පෞද්ගලික අංශවල ආයතන ප්‍රධානීන් සමඟ සාකච්ඡාවක් පැවැත්වුණා.

ඒ ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙන් ජනාධිපති ලේකම් කාර්යාලයේදී ඊයේ (30) පස්වරුවේදීයි.

‘සුපිළිපන් දේශයක් කරා’ යන තේමාව යටතේ ජනාධිපති අනුර කුමාර දිසානායක මහතාගේ සංකල්පයකට අනුව පසුගිය අප්‍රේල් මස 09 වන දින ‘ජාතික දූෂණ විරෝධී ක්‍රියාකාරී සැලැස්ම’ එළිදක්වන ලද අතර, 2025 වසරේ සිට ඉදිරි වසර පහක කාලය තුළ එය ක්‍රියාත්මක කිරීමට නියමිතයි.

ජනාධිපති ලේකම්වරයා මෙහිදී පෙන්වා දුන්නේ,

ජාතික දූෂණ විරෝධී ක්‍රියාකාරී සැලැස්මෙහි ඇතුළත් ක්‍රියාකාරකම්වලට අදාළව වගකීම් පැවරී ඇති සියලු ආයතනවල ප්‍රධානීන්, තමන් වෙත පැවරී ඇති වගකීම් ඉටු කිරීම සඳහා ක්‍රියාකාරී සැලැස්මක් සකස් කළ යුතු බවත්, ජාතික මෙහෙයුම් කමිටුව එම ක්‍රියාකාරී සැලසුම්වල ප්‍රගතිය වරින්වර සමාලෝචනය කළ යුතු බවයි.

මෙම ජාතික මෙහෙයුම් කමිටුව රාජ්‍ය අංශයේ මෙන්ම පෞද්ගලික අංශයේ නියෝජිතයින්ගෙන් සමන්විත වන අතර, ජනාධිපති ලේකම් ආචාර්ය නන්දික සනත් කුමානායක මහතා කමිටුවේ සභාපති ලෙසද, අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්
රංග දිසානායක මහතා කමිටුවේ උප සභාපති සහ කැඳවුම්කරු ලෙසද කටයුතු කරයි.

අලි මිනිස් ගැටුම් වලක්වන්න විපක්ෂ නායකගෙන් දසවදෑරුම් වැඩපිළිවෙළක්

අලි මිනිස් ගැටුම වළක්වන්න රට වටේ තුවක්කු නොබෙද දසවදෑරුම් වැඩපිළිවෙළ ක්‍රියාත්මක කරන ලෙස විපක්ෂ නායක සජිත් ප්‍රේමදාස මහතා රජයට යෝජනාවක් කර තිබෙනවා.

ඒ යටතේ

01- විධිමත්, විද්‍යාත්මක හා නිවැරදි වන අලි සංගණනයක් ක්‍රියාත්මක විය යුතුයි.

02- 2020 වසරේ වන අලි මිනිස් ගැටුම අවම කරන්න නිර්මාණය කළ ජාතික සැලසුම වහාම ක්‍රියාත්මක කළ යුතුයි.

03- මෙම වැඩසටහන් ක්‍රියාත්මක කරන්නට ජනාධිපතිවරයාගේ නායකත්වයෙන් විශේෂ ජනාධිපති කාර්ය සාධන බලකායක් ඇති කර විවිධ ආයතන හා අමාත්‍යාංශ සම්බන්ධීකරණය කර 2020 ක්‍රියාකාරි සැලසුම ඉදිරියට ගෙන යා යුතුයි.

04- ඇතුන් සංරක්ෂණය කරන ආරක්ෂා කරන විශේෂ බලකායක් නිර්මාණය කළ යුතුය.

05- වනඅලි මිනිස් ගැටුම අවම කරන්නට කටයුතු කිරීමේ දී දත්ත කේන්ද්‍රීයව ක්‍රියාත්මක විය යුතුය.

06- අලි මිනිස් ගැටුම නිසා ජිවිත හානි, දේපල හානි, වගා හානි විශාල ලෙස සිදුවන නිසා නිසි රක්ෂණ හා වන්දි ක්‍රමවේදයක් හඳුන්වා දිය යුතුයි.

07- මීට වසර කිහිපයකට පෙර යෝජනා කළ Project Elephant, Project Leopard, Project Whale වැනි ජාතික වැඩසටහන් ගණනාවක් ක්‍රියාත්මක කළ යුතුයි.

08- හරිත කේන්ද්‍රීය හා වනජීවී සංරක්ෂණ කේන්ද්‍රීයව ආධාර ලබා ගත හැකි නිසා මේවා කෙරෙහි අවධානය යොමු කළ හැකි බවත් විපක්ෂ නායකවරයා පෙන්වා දී තිබෙනවා.

09- වන ජිවී ක්ෂේත්‍රයේ ඇති මානව හා භෞතික සම්පත් හිගතාවට පියවීමට කටයුතු කළ යුතු යි.

10- පරිසරය, වනජීවී සංරක්ෂණය කේන්ද්‍ර කර ගත් දැනුම ලබා දෙන නූතන මට්ටමේ ජාත්‍යන්තර විශ්වවිද්‍යාලයක් ආරම්භ කළ යුතු යි.

ඒ යටතේ පර්යේෂණ වැඩසටහන් ක්‍රියාත්මක කිරීම තුළින් පරිසර කේන්ද්‍රීය සංරක්ෂණ වැඩසටහන් හරහා සංචාරක ක්ෂේත්‍රය ද ඉහළ නැංවිය හැකි බවයි විපක්ෂ නායකවරයා වැඩිදුරටත් පවසා සිටියේ.

ඉන්දියාව සහ බ්‍රසීලයට ඇමරිකාවෙන් ඉහළ තීරුබදු

අගෝස්තු 1 වැනිදා සිට ඉන්දියාවේ භාණ්ඩ සඳහා 25% ක තීරුබදු පනවන බව ඇමරිකාවේ ජනාධිපති Donald Trump ඊයේ (30) සමාජ මාධ්‍ය ඔස්සේ ප්‍රකාශ කළේය.

ඉන්දියාවේ තීරුබදු ඉතා ඉහළ බව Donald Trump සමාජ මාධ්‍ය ඔස්සේ පැවසීය. ඉන්දියාවේ තීරුබදු නොවන බාධා වෙනත් ඕනෑම රටකට වඩා “කරදරකාරී” වන අතර, එහි ප්‍රතිඵලයක් ලෙස වසර ගණනාවක් දෙරට අතර වෙළඳාම සාපේක්ෂව කුඩා පරිමාවක පැවති බවද හෙතෙම සඳහන් කළේය.

එදිනම ධවල මන්දිරය ප්‍රකාශ කළේ ජනාධිපති Donald Trump බ්‍රසීලයට එරෙහිව 40% ක තීරුබදු පැනවීමේ විධායක නියෝගයකට අත්සන් කර ඇති බවය. ඉන් බ්‍රසීලයට පැනවෙන මුළු තීරුබදු අගය 50% දක්වා ඉහළ යනු ඇත.

-CGTN Sinhala

ඓතිහාසික ඇසළ පෙරහැර මංගල්‍යයේ දෙවන කුඹල් පෙරහැර අදයි

සෙංකඩගල ඇසළ පෙරහැර මංගල්‍යෙයේ දෙවන කුඹල් පෙරහැර අද (31) රාත්‍රීයේ දී වීදි සංචාරය කිරීමට නියමිතයි.

පස්වරු 07.01ට යෙදෙන සුබ මොහොතින් නාථ, විෂ්ණු, කතරගම හා පත්තිනි යන සිව් මහ දේවාල පෙරහැර දළදා පෙරහැරට එක්ව වීදි සංචාරයට කරයි.

පෙරහැර දළඳා වීදිය, ඩී.එස්.සේනානායක වීදිය ඔස්සේ ගමන් කොට රජ වීදියෙන් ශ්‍රී දළදා මාලිගාව වෙත ලඟා වීමට නියමිතයි.

පළමු කුඹල් පෙරහැර ඊයේ රාත්‍රියේ දී (30) ආකර්ෂණීය ලෙස වීදි සංචාරයෙහි යෙදුනා.

සධාකුත පෙරහැර කරඩුව වැඩම කරන ලද්දේ ශ්‍රී දළදා මාලිගාවේ ඇත් පන්තියට අයත් ඉන්දිරාජා හස්තියා යි.

කෝට්ටේ රජ මහ විහාරයේ කෝට්ටේ රාජා සහ දළදා මාලිගාවේ ඇත් පන්තියට අයත් මියන් රාජා දෑලේ ගමන් ගත්තා.

පළමු කුඹල් පෙරහැර නැරඹීම සඳහා දෙස් විදෙස් සංචාරකයන් විශාල පිරිසක් සහභාගී වී තිබුනා.

මාලදිවයින් රාජ්‍ය සංචාරය සාර්ථකව නිම කරමින් ජනපති දිවයිනට

පසුගිය 28 වැනිදා ආරම්භ කළ මාලදිවයින් රාජ්‍ය සංචාරය සාර්ථකව අවසන් කරමින් ජනාධිපති අනුර කුමාර දිසානායක මහතා ඊයේ (30) රාත්‍රියේ දිවයිනට පැමිණියා.

ජනාධිපතිවරයා මෙම සංචාරයේ නිරත වූයේ මාලදිවයින් ජනාධිපති ආචාර්ය මොහමද් මුයිසු මහතාගේ ආරාධනයකට අනුවයි.

මෙම සංචාරයේදී ජනාධිපතිවරයා විසින් මලදිවයින් ජනාධිපතිවරයා සමග මෙන්ම මාලදිවයිනේ කැබිනට් අමාත්‍යවරුන් ඇතුළු රාජ්‍ය ප්‍රධානීන් සමඟ වැදගත් ද්විපාර්ශ්වික, කලාපීය සහ ජාත්‍යන්තර කරුණු පිළිබඳව පුළුල් ලෙස සාකච්ඡා පවත්වා තිබුණා.

මෙම සංචාරය තුළදී ශ්‍රී ලංකාව සහ මාලදිවයින අතර අන්‍යෝන්‍ය නීති අධාර ගිවිසු‍මක් සහ මාලදිවයිනේ විදේශ සේවා ආයතනය (FOSIM) සහ බණ්ඩාරනායක රාජ්‍යතාන්ත්‍රික පුහුණු ආයතනය අතර අවබෝධතා ගිවිසුමක් හුවමාරු කර ගැනීමද විශේෂත්වයක්.

දෙරට අතර සමීප මිත්‍රත්වය සහ සහයෝගීතාව තවදුරටත් ශක්තිමත්ව පවත්වා ගෙන යාමට මෙහිදී දෙපාර්ශ්වයම එකඟතාව පළ කළ තිබෙනවා.

මෙම රාජ්‍ය සංචාරය සඳහා විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා සහ රජයේ ජ්‍යෙෂ්ඨ නිලධාරීහු පිරිසක්ද එක් විය.

ශ්‍රී ලංකාව “2025 සඳහා ලොව හොඳම දූපත” ලෙස නම් කෙරේ

ගෝලීය සංචාරක වේදිකාවක් වන Big 7 Travel විසින් ප්‍රකාශයට පත් කරන ලද “ලෝකයේ හොඳම දූපත් 50” ලැයිස්තුවට අනුව 2025 දී ශ්‍රී ලංකාව එම ලැයිස්තුවේ පළමු තැනට පත් වී තිබෙනවා.

ප්‍රංශ පොලිනීසියාවේ මොරියා, ඉක්වදෝරයේ ගැලපගෝස් දූපත් සහ සීෂෙල්ස් වැනි ගෝලීය වශයෙන් ප්‍රසිද්ධ දූපත් අභිබවා යමින්, මෙම වසරේ සංචාරය කළ යුතුම දූපත් ගමනාන්ත අතර ශ්‍රී ලංකාව ප්‍රමුඛස්ථානය ලබා ගෙන තිබීම විශේෂත්වයක්.

“ඉන්දියාවේ දකුණු වෙරළට ඔබ්බෙන් පිහිටි මෙම කඳුළු බිඳු හැඩැති දූපතේ ඒ සියල්ල තිබේ,” “මාකෝ පෝලෝ ශ්‍රී ලංකාව, ‘ලෝකයේ එහි ප්‍රමාණයෙන් හොඳම දූපත’ ලෙස හැඳින්වූයේ මන්දැයි බැලීම පහසුය” යනුවෙන් මහත් අපූර්ව ලෙස ශ්‍රී ලංකාව සංචාරක වෙබ් අඩවිය මහත් අපූර්ව ලෙස වර්ණනා කර තිබුණා.

මෙම ලැයිස්තුව සකස් කිරීමට පදනම වී ඇත්තේ පෙර මාධ්‍ය ප්‍රතිඵලවලින් ලබාගත් ලකුණු, Big 7 සංචාරක කතුවැකි කණ්ඩායමේ දායකත්වයන්, සමාජ මාධ්‍යවල ගමනාන්ත ජනප්‍රියතාවය සහ 2025 දී සංචාරකයින්ගේ අවධානය දිනාගත් ගමනාන්ත මත යි.

තේ වතු, සැතපුම් 833 ක වෙරළ තීරය, පන්සල්, යටත් විජිත නගර, මීදුම සහිත කඳු සහ කොටි සහ අලි ඇතුන් වාසය කරන යාල ජාතික වනෝද්‍යානයේ වනජීවී සෆාරි අතර ගමන් මාර්ග පිලිබද වෙබ් අඩවිය විසින් ප්‍රශංසාවට ලක් කර තිබෙනවා.

ඉහළම ශ්‍රේණිගත කිරීම් 10 අතරට ඇතුළත් වන අනෙකුත් රටවල් ලෙස,

2. මුඕරියා, ප්‍රංශ පොලිනීසියාව

3. සොකොට්‍රා, යේමනය

4. මැඩෙයිරා

5. ගැලපගෝස්, ඉක්වදෝරය

6. මහා එක්සුමා, බහමාස්

7. සීෂෙල්ස්

8. අචිල් දූපත, අයර්ලන්තය

9. කෝලිප්, තායිලන්තය

10. මිලෝස්, ග්‍රීසිය

මෙම රටවල් 10 සහිතව තවත් රටවල් 40 ක් මෙම වසරේ සංචාරය කිරීමට හොදම රටවල් ලෙස Big 7 Travel වෙබ් අඩවිය තුල සදහන් කර තිබෙනවා.

ශ්‍රී ජයවර්ධනපුර රෝහලට නව සභාපතිවරයෙක්

ශ්‍රී ජයවර්ධනපුර රෝහලේ නව සභාපතිවරයා ලෙස වෛද්‍ය තමර කළුබෝවිල පත් කෙරේ.

සෞඛ්‍ය හා ජන මධ්‍ය අමාත්‍ය වෛද්‍ය නලින්ද ජයතිස්ස විසින් ඊට අදාල පත්වීම් ලිපිය ඊයේ (29) වෛද්‍ය තමර කළුබෝවිල වෙත භාර දෙනු ලැබුවා. ඒ සෞඛ්‍ය හා ජන මධ්‍ය අමාත්‍යංශයේදී ය.

වෛද්‍ය තමර කළුබෝවිල කොලඹ රාජකීය විද්‍යාලයෙන් උසස් අධ්‍යාපනය හදරා ඇත. 1986 වසරේදී කොලඹ වෛද්‍ය පීඨයෙන් MBBS වෛද්‍ය උපාධිය ලබාගෙන වෛද්‍ය වෘත්තියට පිවිස තිබේ.

වෛද්‍ය පරිපාලන සේවාවට අදාල පශ්චාත් උපාධිය කොලඹ පශ්චාත් උපාධි ආයතනයේ 2002 වසරේ ලබාගෙන ඇති අතර ඔහු ඉන් අනතුරුව පානදුර, හොරණ, කළුතර රෝහල්වල අධ්‍යක්ෂ මෙන්ම කළුතර දිස්ත්‍රික් සෞඛ්‍ය සේවා අධ්‍යක්ෂ ආදී වශයෙන් වෛද්‍ය ක්ශෙත්‍රයේ තනතුරු රැසක් හොබවා ඇත.

channel 7

Today News

කෙසෙල් පෙට්ටිවලින් රට පුරා ආයුධ ප්‍රවාහනය කරන හැටි

SPAවලට පනින පොලිසියට ‘ SPA අයිතිකරුවන් ‘ දැළ එලන්න හදන හැටි

ඕස්ට්‍රේලියාවේ බිලියනපතියෙක් වූ ‘පළමු ලාංකිකයා’ රොෂ් ජලග්ගේ ගැනයි මේ

LIVE

Channel7 සජීව විකාශය නැරඹීමට පිවිසෙන්න

දින 60ක සටන් විරාමයකට ඊශ්‍රායලය සූදානම් බව ඇමරිකානු ජනපති ඩොනල්ඩ් ට්‍රම්ප් පවසයි